இனிமையான பொருட்கள் அனைத்தையும் விட இனிமையானது என்று ஒன்று உண்டென்றால், மங்களகரமான பொருட்கள் அனைத்தையும் விட மங்களகரமானது என்று ஒன்று உண்டென்றால், பவித்ரமான பொருட்கள் அனைத்தையும் விட பவித்ரமானது என்று ஒன்று உண்டென்றால், அது இறைவனின் நாமம் மட்டுமே! (அல்லது இறைவனே!). உலகியலான நாட்டம் கொண்டவர்கள் மற்றும் அசுரகுணம் படைத்தவர்களுடனான சகவாசத்தை விட்டுவிடுங்கள். அனைத்து தீய செயல்களிலிருந்தும் விலகியிருங்கள். சத்சங்கத்தை எப்போதும் நாடுங்கள். இறைவனிடம் சரணடைந்து விடுங்கள்; பரமபவித்ரமான அவனே, சாந்தி, சௌக்கியம், ஞானம் ஆகியவற்றின் திருவுருவமாவான். அப்படிப்பட்ட இறைவன் அனைவருள்ளும் வீற்றிருக்கிறான். எங்கு பக்தர்கள் பக்தியுடன் இறைநாமத்தை எப்போதும் ஒன்றிணைந்து பாடுகிறார்களோ, அங்கு பரமாத்மாவாகிய இறைவன் நிரந்தரமாக வாசம் செய்கிறான். முதலில், நீங்கள் அந்த பரமாத்மாவின் மீது அதீத பக்தியைக் கடைப்பிடியுங்கள். அப்போது, நீங்கள் உண்மையான, நிலையான சௌக்கியத்தையும் ஞானத்தையும் நிச்சயமாகப் பெற முடியும். கணநேரமே நீடித்திருக்கும் புலன்சார்ந்த இன்பங்களின் பின்னால் ஓடித் திரிவதால் என்ன பயன்? உங்கள் உற்ற நண்பனைவிட அருகாமையில் உள்ள, உங்களுடைய இதயக் குகையிலேயே வாசம் செய்யும், உங்களுடைய தாய், தந்தை, குருவாக விளங்கும் இறைவனை ஆராதனை செய்யுங்கள். இறைவன் இவர்கள் அனைத்துமாகவும், அதற்கும் மேலாகவும் உங்களுக்கு விளங்குகிறான்! (பிரசாந்தி வாஹினி, அத்தியாயம்-26)