நாம் ஏதோ சீனியர், ஜூனியர் என்று சில இங்கு தராதரங்களை வைத்திருப்பதைப் போல, நாங்கள் 20, 15, 10 வருடங்களாக புட்டபர்த்திக்கு வருகிறோம் என்று மக்கள் பெருமிதம் கொள்கின்றனர். உண்மையில் சொல்லப்போனால் இத்தகைய தொடர்பினால் பயன்தரும் மாற்றங்கள் நடத்தையிலோ குணநலன்களிலோ ஏற்பட்டதை மட்டுமே ஒருவர் மதிப்பில் கொள்ள வேண்டும். இங்கிருந்து கற்றுக்கொண்ட பாடங்களை நீங்கள் எந்த அளவுக்கு மனதில் கொண்டிருக்கிறீர்கள்? புறம் சார்ந்த புலன்கள் உங்கள் விவேகத்தில் ஏற்படுத்தும் கசிவுகளை நிறுத்துவதிலும், அக ஆனந்த ஊற்று வற்றிப்போவதை தடுப்பதிலும் நீங்கள் எந்த அளவு வெற்றி பெற்றிருக்கிறீர்கள்? கண்கள் உங்கள் பார்வையை நூறு திசைகளில் சிதறடிக்கின்றன; காதுகள் உங்கள் மனதை பொய்மையான இசைக்கு இழுக்கின்றன; கைகள் நூறு தகாத செயல்களைச் செய்ய ஏங்குகின்றன; இவை மனிதனை தரம்தாழ்த்தி அழிக்கின்றன. மனிதன் தெய்வீகமானவனாதலால் அவன் வாழ்வதற்கு அவனைச் சுற்றி எல்லா நேரமும் தெய்வீகம் இருக்க வேண்டும்; மீனைப் போல, தெய்வீக ஆனந்தமாகிய நீர் அவனைச் சூழ்ந்திருக்க வேண்டும். மாறாக, இப்போது செயற்கை சுவாசத்தினாலும், தானம் பெற்ற ரத்தத்தினாலும் தன்னை உயிருடன் வைத்திருக்க முற்படுகிறான். (தெய்வீக அருளுரை, நவம்பர் 23, 1965)