ஆன்மிக சாதகர்கள் தங்கள் குறைகளைச் சுட்டிக்காட்டுபவர்களின் மீது ஒருபோதும் வெறுப்பு கொள்ளக் கூடாது; ஏனென்றால் அது 'நல்லதை' வெறுப்பது போல ஆகிவிடும். நல்லதை விரும்பி, கெட்டதை நிராகரிக்க வேண்டும். நினைவில் கொள்ளுங்கள், கெட்டதை வெறுக்கக்கூடாது. அதை விட்டுவிட வேண்டும், தவிர்க்க வேண்டும். இதைச் செய்யக்கூடியவர்கள் மட்டுமே தியானம் மற்றும் ஆன்மிக ஞானத்தில் முன்னேற்றம் அடைய முடியும். ஆணவம், பொறாமை, தானே உயர்ந்தவன் எனக் காட்டிக்கொள்ளும் ராஜஸ சுபாவம், கோபம், மற்றவர்களின் பலவீனம் மற்றும் தோல்விகளைப் பற்றித் தெரிந்துகொள்வதில் ஆர்வம், கபடம் ஆகிய அனைத்தும் தியானத்தின் பாதையில் தடைகளாகும். இவை வெளிப்படையாகக் காணப்படாவிட்டாலும், தவறான வழிகளில் ஒருவரைத் தூண்டும் அக உந்துதல்கள் மனதில் மறைந்திருக்கும். நீண்ட நாட்களாக மூடி வைக்கப்பட்டு, கவனிப்பாரற்று துர்நாற்றம் வீசும் அறையைத் தங்குவதற்கு ஏற்ப தயார் செய்ய வேண்டுமென்றால், அதைத் திறந்து, சுத்தம் செய்து, நன்றாகப் பெருக்கித் துடைக்க வேண்டி இருக்கும். அதைப் போலவே, மனதையும் தியானத்தின் மூலம் சுத்தம் செய்ய வேண்டும். (தியான வாஹினி, அத்தியாயம்-14)