புனிதத்தலங்களில், கையில் ஒரு பூமாலையை வைத்துக்கொண்டு வெட்டிப்பேச்சுக்களில் ஈடுபடுவது பக்தியே அல்ல. என்னிடத்தில் யாரும் பூக்களையும், பழங்களையும் கொண்டு வருவதை நான் விரும்புவதுமில்லை, அதைப் பாராட்டுவதுமில்லை. நறுமணமுள்ள பரிசுத்தமான இதயம் எனும் மலரையும், ஆன்மிக சாதனையால் கனிந்த மனம் எனும் பழத்தையும் என்னிடம் கொண்டு வாருங்கள் - நான் மிகவும் விரும்புவது இவற்றையே; மனதை மேம்படுத்திடும் எந்த முயற்சியும் இன்றி, உங்களுக்கு வெளியில் காசுக்குக் கிடைக்கும் இவற்றை அல்ல. அத்தகைய முயற்சியின் சுவையைப் பெற, நீங்கள் ஆன்றோர் மற்றும் நல்லோருடன் பழக வேண்டும், நற்சிந்தனைகளில் களிப்புற வேண்டும். எந்த வழியிலாவது உங்களுடைய ஆனந்தத்தின் அளவை அதிகரித்து, பகுத்தறிவின் தரத்தை மேம்படுத்தி, இவ்விரண்டையும் எந்த அளவுக்கு முடியுமோ அந்த அளவுக்கு சேமித்து வைத்துக் கொள்ளுங்கள்; அப்போதுதான் தேவைப்படும்போதெல்லாம் நீங்கள் இந்த சேமிப்பிலிருந்து எடுத்துப் பயன்படுத்திக் கொள்ள முடியும்! (தெய்வீக அருளுரை, செப்டம்பர் 01, 1958)