நமது அன்றாட அனுபவங்களில், ஒவ்வொருவருள்ளும் உறையும் தெய்வீகத்தை வெளிப்படுத்திக் காட்டும் பல நிகழ்வுகள் உள்ளன. ஒரு சினிமாவை எடுத்துக் கொள்ளுங்கள்; வெள்ளித் திரையில், ஆறுகளின் வெள்ளம், சுற்றியிருக்கும் நிலங்களை மூழ்கடிப்பதைக் காண்கிறோம். இந்தக் காட்சி முழுவதும் வெள்ள நீரில் மூழ்கி இருந்தாலும், வெள்ளித்திரை ஒரு துளி நீரால் கூட நனைவதில்லை. மற்றொரு சமயம், அதே திரையில்,எரிமலைகள் கொழுந்து விட்டு எரிவதை நாம் பார்க்கிறோம்; ஆனால் ,வெள்ளித் திரை எரிவதில்லை. இந்த அனைத்து படங்களுக்கும் ஆதாரமாக இருக்கும் வெள்ளித் திரை அவை எவற்றாலும் பாதிக்கப் படுவதில்லை. அதைப் போலவே, ஒரு மனிதனில் வாழ்க்கையில் நல்லவை அல்லது கெட்டவை,சுகம் அல்லது துக்கம், பிறப்பு அல்லது இறப்பு ஆகியவை வரும், போகும், ஆனால், அவை ஆத்மாவை பாதிப்பதில்லை. இந்த வாழ்க்கை எனும் சினிமாவில், ஆத்மாவே வெள்ளித் திரை. அதுவே சிவம், அதுவே சங்கரம், அதுவே தெய்வீகம். இந்த தத்துவத்தை ஒருவர் புரிந்து கொண்டு விட்டால், ஒருவர் வாழ்க்கையைப் புரிந்து கொண்டு, அதை சந்தோஷமாக அனுபவித்து, அதில் பூரணத்துவத்தைக் காண முடியும் !