தற்காலத்தில், பதட்டமும், பயமும், மனிதர்களிடையை பரவிக்கொண்டு இருக்கிறது; தர்மத்திற்கு ஒரு பின்னடைவு ஏற்பட்டுள்ளது. மனித குலத்தை நல்வழியில் நடத்துவதற்கான, கலங்கரை விளக்கம் போலத் திகழும் வேதங்கள் வகுத்துள்ள இலட்சியங்களைப் பின்பற்றுவதற்கு, மக்களை இணங்க வைத்தால் மட்டுமே, உலகம்,சாந்தி மற்றும் இசைவைத் திரும்பப் பெற முடியும். உங்கள் அன்றாட வாழ்க்கையின் அனைத்து கர்மாக்களும், உண்மையில் தர்மத்தைக் கடைப்பிடிப்பதைத் தான் பேசுகின்றன. உபநிஷதங்கள், வாழ்க்கைப் பயணத்தில், எதைச் செய்ய வேண்டும், எதைத் தவிர்க்க வேண்டும் என்பதற்கான வழிகாட்டுதலை அளிக்கின்றன. ஒருவர் தன்னை, நற்கர்மங்களில் ஈடுபடுத்திக் கொள்வதற்கு, ஆன்மீக ஞானம் ஒரு அத்தியாவசியமான முன் முதல் தேவையாகும். அவை, நாம் தாயைக் கடவுளாகவும், தந்தையைக் கடவுளாகவும், குருவைக் கடவுளாகவும், விருந்தினரையும் கூடக் கடவுளாகவும் மதிக்க வேண்டும் என வழி காட்டுகின்றன. நாம் சத்தியத்தையும், தர்மத்தையும்,புறக்கணிக்கக் கூடாது என அவை எச்சரிக்கின்றன. எனவே, அதில், நேரான மற்றும் எதிர்மறையான அறிவுரைகள் உள்ளன – இந்த ஆலோசனைகளைப் பின்பற்றுங்கள், பிறவற்றை அல்ல. எவை எல்லாம்,நல்லவற்றில் நீங்கள் முன்னேறுவதற்கு உகந்தவையோ அவற்றை ஏற்றுக் கொள்ளுங்கள்; மற்றதைத் தவிர்த்து விடுங்கள்.