ஸ்ரீமத் பகவத்கீதையில் ஒரு முக்கிய ஸ்லோகம் (அத்யாயம் 12, ஸ்லோகம் 20) கூறுகிறது: அமரத்துவத்தை அடைவதற்கான தார்மீக வழியைப் போற்றி, அனைத்து நம்பிக்கையுடனும், என்னையே அவர்களது இறுதி இலக்காகக் கொண்டு முழுமையாக ஈடுபடுபவர்கள் எனக்கு அளவுக்கு அதிகமாக பிரியமானவர்கள். இந்த ஸ்லோகம் தெரிவிக்கும் ஒரு கருத்து தான் எவ்வளவு மகத்தானது ! பகவான், இதில் தெள்ளத் தெளிவாக,யாரிடம் இந்த குணங்கள் உள்ளனவோ- அதாவது யார்,பகவான் மட்டுமே இறுதிக் குறிக்கோள் என்பதில் நம்பிக்கை கொண்டு, ஒருமித்த மனதுடன், அவர் மீதே பற்று வைத்து இருக்கிறார்களோ- அவர்களே அவருக்கு மிகவும் பிரியமானவர்களும், நெருக்கமானவர்களும் ஆவார்கள் என அறிவிக்கிறார். இங்கு பயன்படுத்தப் பட்டுள்ள '' அமரத்துவத்தை அடைவதற்கான தார்மீக வழி (தர்ம்ய-அம்ருதம்)'' என்ற பதத்தைக் கவனியுங்கள்.அதைப் பற்றிச் சிந்தித்து, அதிலிருந்து உத்வேகம் பெறுங்கள். எவர் ஒருவர் இறைவனது தர்மத்தைக் கடைப்பிடிக்கிறார்களோ, அவர்கள் மட்டுமே இறைவனது அருளமுதத்திற்குத் தகுதியானவர்கள்.சாதாரண மனிதர்கள் தங்களுக்கு இறைவன் பால் பக்தி உள்ளது என நம்புகிறார்கள்; ஆனால் இறைவன் அவர்கள் பால் அன்பு கொண்டுள்ளானா என்பதைப் பற்றி அவர்கள் ஆராய்வதே இல்லை. இறைவனது அன்பைக் கண்டறிவதற்கு ஏங்கும் மனிதர்கள், அரிதானவர்களே. அது தான் ஆன்மீக வெற்றியின் உண்மையான அளவு கோலாகும்.