பகவான் ஸ்ரீமத் பகவத் கீதையில்,'' எனது மாயை '' என பறைசாற்றுகிறான். இதன் உட்பொருள், இந்த உலகம் அவனது கை வண்ணம் , அவனது லீலை மற்றும் அவனது மஹிமை என்பதாகும். இதன் மூலமும், சூத்ரதாரியும், தலைவனும் ஆன அவனைக் காண விழையும் அனைவருக்கும் ஒரு உத்வேகம் அளிக்கும், பயிற்சி அரங்கமாகவே இந்த உலகம் வடிவமைக்கப் பட்டுள்ளது. அவனது நாடக மேடையே இந்த உலகம் என்பதை நீங்கள் கண்டு கொண்டு விட்டால், பின்னர் எந்த தந்திரங்கள் அல்லது அரங்க ஜாலங்களால், ஏமாற்றப் படவோ, திசை திரும்பவோ, வழி தவறவோ மாட்டீர்கள். மாயையிலிருந்து, நீங்கள் அதைப் படைத்தவன் மற்றும் அதன் தலைவன் மீது கவனம் செலுத்த வேண்டும். நீங்கள் நாடக அரங்கில் இருக்கும் போது, அது நடக்கும் வரை தான் அந்த நாடகம் உண்மையானதாகத் தெரியும். அதைப் போலவே, இந்த உலகும் ஒரு கானல் நீரே ! ஒரு கானல் நீர் மழையிலிருந்து தோன்றுவதில்லை. அது,ஒரு ஏரியையோ, கடலையோ சென்று அடைவதில்லை.அது சூரிய உதயத்திற்கு முன்னும் இருப்பதில்லை, சூரிய அஸ்தமனத்திற்குப் பின்னும் இருப்பதில்லை. அது நடுவில் வந்து போகும், கண்டு கொள்ளாமல் விடப் பட வேண்டிய ஒரு நிகழ்வே ! அதைப் போலவே, இறைவன் இந்த உலகை விட உண்மையானவன்- இதுவே பாரத சாஸ்திரங்களின் சாரமும் ஆகும்.